УЛОГАТА НА ФИЗИКАЛНАТА ТЕРАПИЈА ВО СПОРТСКАТА МЕДИЦИНА

Abstract

Спортските повреди настануваат како резултат на травма или пренапрегање и ги вклучуваат сите ткива на локомоторниот апарат. Најчесто настануваат повреди на мускули, лигаменти, тетиви, како и на коските. Посериозни повреди вклучуваат и комбинација на коскено и меко ткиво, како и повреда на зглобовите. При акутните спортски повреди спортистот е вознемирен поради болката или можните последици од евентуалната сериозна повреда. Доброто првично проценување бара препознавање на повредата на местото на настанот и брзо отпочнување со третман. Потребен е тимски пристап со специјалист ортопед и искусен медицински физиотерапевтски персонал кои имаат тесна соработува со тренерот, судиите и другите администратори. Најчестите повреди се на коленото, но можат да бидат локализирани и на скокалниот зглоб, рамото, лактот, ‘рбетниот столб, главата и други регии на локомоторниот апарат. Повредите можат да настапат акутно, неочекувано, како резултат на удар, груба игра и пренапрегање, но можат да бидат резултат и на хронично оптоварување на спортистот. Со навремена, соодветно дозирана и добро спроведена физикална терапија, спортистот брзо и успешно се опоравува и се враќа кон спортските активности.